САД ја нападнаа Исламска држава во Сирија

Соединетите Американски Држави соопштија дека нивната војска извршила масовен напад врз позиции на Исламска држава во Сирија, како одговор на смртоносниот напад врз американските сили во земјата.

Според Централната команда на САД (Центком), борбени авиони, хеликоптери за напад и артилерија погодиле над 70 цели на повеќе локации низ централна Сирија, а во операцијата учествувале и јордански авиони, пренесува Би-Би-Си.

Во нападот биле употребени повеќе од 100 прецизно наведувани муниции, насочени кон позната инфраструктура на ИСИС, складишта со оружје и логистички капацитети. Операцијата, наречена „Напад со Хокај“, започнала во петокот во 16:00 часот по источно време.

Американскиот претседател Доналд Трамп изјави дека САД „удираат многу силно“ врз упориштата на ИСИС, по заседата на 13 декември во близина на Палмира, во која беа убиени двајца американски војници и еден американски цивилен преведувач.

Командантот на Центком, адмирал Бред Купер, изјави дека САД ќе продолжат немилосрдно да ги гонат терористите кои претставуваат закана за Американците и нивните партнери во регионот.

Американскиот секретар за одбрана Пит Хегсет нагласи дека операцијата не претставува почеток на војна, туку, како што рече, „декларација за одмазда“ и порака дека нападите врз американски државјани нема да останат без одговор.

Share on Facebook

Tweet

Follow us

Save