СДСМ „ја откри Америка“: Јанушев имал бугарска фирма

СДСМ денес се јави со прес-конференција за бугарска фирма на генералниот секретар на Владата, Игор Јанушев, за која Инфомакс пишуваше пред две години.

Опозицискиот СДСМ денеска обвини дека генералниот секретар на Владата, Игор Јанушев, е поврзан со компанијата „Флугбан транс“ со седиште Ќустендил, Бугарија. Дејноста на фирмата, како што велат од СДСМ, е патен линиски превоз на стока, управител е Кире Гешоски, а третиот партнер е Сашо Апостоловски.

Оттаму обвинија дека Јанушев во ниту еден од своите анкетни листови поднесени до Државната комисија за спречување корупција нема наведено дека е поврзан со фирма во Бугарија која во случајов, како што додаваат од СДСМ, пријавува годишен промет од околу 320 000 евра и нето-добивка под 10 000 евра.

„Генералниот секретар на Владата, Игор Јанушев, има бугарски пасош, односно е бугарски државјанин. Прашањето кое треба да го одговори на кои бугарски корени се повикувал Јанушев? Сега излегуваат информации дека е поврзан и со фирма во Бугарија. Тука е суштината на скандалот кој бара институцинална истрага и постапка. Зошто Јанушев не го пријавел бугарскиот капитал?“,велат од СДСМ.

Партијата ги повика надлежните институции да отворат предмет за случајот, додавајќи дека за давање лажни податоци за имотната состојба на функционерите им се заканува затворска казна од шест месеци до пет години. Оттаму прашуваат и дали Јанушев ќе поднесе оставка додека трае истрагата за неговата компанија во Бугарија.

„Ова е дел од пошироката слика за лицемерието и лажниот однос на владата на Мицкоски кон граѓаните. Додека Мицкоски и неговите најблиски соработници имаат бизнис-интереси во Бугарија, истовремено ја блокираат европската интеграција на Македонија“,коментираат од СДСМ.

Share on Facebook

Tweet

Follow us

Save