Трамп не исклучува вонредни мерки пред изборите: „Би можел да го употребам Законот за бунт“

Американскиот претседател Доналд Трамп одби да ја исклучи можноста за прогласување вонредна состојба и повикување на Законот за бунт во пресрет на ноемвриските конгресни избори.

Изјавата потекнува од интервју за магазинот „Тајм“, дадено на 28 септември. Прашањето се однесувало на периодот пред изборите, а не конкретно по нив, како што се наведува во дел од објавите што кружат.

„Ништо не исклучувам, ниту потврдувам. Ќе видиме“, одговорил Трамп, по што самиот го споменал Законот за бунт. Додал дека досега не го употребил, но дека би можел да го стори тоа.

Неговите зборови не претставуваат објавена одлука за активирање на законот или за прогласување вонредна состојба. Сепак, оставањето на таа можност отворена дополнително го насочува вниманието кон улогата на федералните власти во изборниот период.

Ројтерс во истражувачки текст разгледува повеќе сценарија за можна интервенција на администрацијата во изборниот процес. Агенцијата наведува дека дел од изборните службеници се подготвуваат за потенцијални нарушувања и за обиди за проширување на федералното влијание врз гласањето. Извештајот е заснован на повеќе од педесет интервјуа, јавни документи и официјални изјави.

Ноемвриските избори ќе одлучуваат за контролата врз Конгресот. Во тој контекст, изјавата на Трамп отвора прашања за неговите намери, но засега не потврдува конкретен план за употреба на војската или за преземање на изборната администрација.

Share on Facebook

Tweet

Follow us

Save