Чешкиот премиер обвинува: Европа е немоќна и не презема ништо за да ја запре војната во Украина

Чешкиот премиер Андреј Бабиш денес ја обвини Европа дека е „немоќна и зборува само за војна“, додека не презема ништо за да го запре конфликтот во Украина, ветувајќи дека лично ќе се бори за ставање крај на „таа одвратна војна“.

„Со нас, ве очекува светла иднина. Исто така, ќе се борам да се стави крај на таа одвратна војна. Неверојатно е. Немоќта на Европа е застрашувачка“, изјави Бабиш – носејќи маица со натпис „НЕ ЗА ВОЈНА“ – во своето редовно неделно видео-обраќање на Фејсбук.

Денес беше првпат Бабиш да изјави дека лично ќе преземе акција; претходно, кога беше прашуван за конкретни предлози или дипломатски начини за завршување на војната, тој тврдеше дека Чешка е премногу мала и дека тој, како премиер, нема доволно моќ – инсистирајќи дека таа задача е во рацете на американскиот претседател Доналд Трамп и на водечките европски лидери.

Бабиш се осврна и на својот говор на Самитот за одбрана во Прага, одржан претходно оваа недела, истакнувајќи дека таму повторил оти Европа воопшто нема желба да разговара за мир.

„Не сакаат. Сите зборуваат само за војна. И ова е одвоено од фактот дека очигледно мораме да се вооружуваме и да бидеме подготвени доколку нешто се случи. Но, каде е иницијативата на Европа? Трамп разговара со Путин, а сепак ние, како Европа, треба да направиме сè за да ја запреме таа војна“, рече денес Бабиш.

Во четвртокот, по предупредувањето од полскиот премиер Доналд Туск дека Русија ги засилува хибридните напади врз територијата на НАТО – и дека тие веќе прераснуваат во кинетичка војна – Бабиш за првпат изјави дека и Чешка се соочува со хибридни напади од Русија.

„Се соочуваме со хибридна војна од Русија и затоа нашите разузнавачки служби посветуваат максимално внимание на сите ризици поврзани со активностите на руските разузнавачки агенции против нашата земја. Ги проценуваме и споделуваме сите достапни информации, како на национално, така и на меѓународно ниво“, изјави Бабиш за приватната чешка телевизија „Нова“, одговарајќи на изјавите на Туск.

Во изјава објавена денес на социјалните мрежи, Бабиш рече дека Чешка ќе направи сè за да ги исполни своите обврски кон сојузниците во НАТО. Тој се осврна на ова прашање како одговор на острите критики од американскиот амбасадор во НАТО, Метју Витакер, кој изјави дека Чешка не презема ништо за да ја исполни обврската за трошење 2% од својот БДП за одбрана – со што се наоѓа на самото дно во Алијансата во тој поглед.

Бабиш му рече на амбасадорот дека Чешка не е во состојба да троши суми за вооружување што се 165 пати поголеми од нејзиниот одбранбен буџет, како што тоа го прават САД. Тој додаде дека, бидејќи претходната влада ја оставила државната каса празна, неговата администрација моментално го прави она што може и во иднина ќе ги засили своите напори.

„Секако, ќе направиме сè за да ги исполниме нашите обврски кон НАТО. Но, треба да зборуваме и за она што го рекол Алберт Ајнштајн; тој го отфрлаше насилството и тврдеше дека мирот не може да се наметне преку насилство или воена надмоќ“, рече Бабиш. Тој особено истакна дека Ајнштајн предупредувал на опасноста од развојот на оружје по Втората светска војна.

„Значи, постоеше предупредување во врска со вооружувањето по Втората светска војна и појавата на атомската бомба; тој активно предупредуваше на опасноста од нуклеарна катастрофа. Секако дека не сакаме Трета светска војна, нели?“, рече Бабиш, пренесува „Бета“.

Share on Facebook

Tweet

Follow us

Save