Јотова и Радев криеле помилувања? Имињата се појавуваат со задоцнување, регистарот полн со пропусти

Во официјалниот регистар на помилувања што го води претседателството на Бугарија се појавиле уште два случаи, кои досега не биле наведени. Ова го откри проверка на бугарскиот весник „Сега“, кој посочува дека информациите за помилувањата со години се објавуваат нецелосно и со задоцнување.

Откако избувна скандалот со помилувањата на новоизбраната претседателка Илијана Јотова, во регистарот на претседателството биле наведени 28 случаи. Последниот се однесувал на Десислава Иванчева, која била помилувана минатото лето. На 3 ноември, во официјален одговор до весникот, од претседателската администрација соопштиле дека бројот на помилувани изнесува 29. Но, во најновата верзија на регистарот се додадени уште два случаи.

Едниот е внесен под број 30 и се однесува на помилување од март годинава. Другиот е додаден ретроактивно, под број 27, а станува збор за указ од декември 2023 година. Дотогаш во регистарот за таа година бил наведен само еден случај, иако во годишниот извештај на Комисијата за помилувања при претседателот стоело дека биле прифатени две молби.

За случајот од 2023 година сега се објавени и првите, но оскудни детали. Станува збор за 52-годишен маж осуден за возење со повеќе од 1,2 промили алкохол во крвта. Поради исклучителни или бројни олеснителни околности, му била изречена затворска казна од четири месеци, под законскиот минимум од една година. Дополнително, му била одземена возачката дозвола на една година и осум месеци.

Издржувањето на затворската казна било прекинато поради тешко заболување. Мажот ефективно издржал 27 дена, а му останале уште три месеци и три дена од казната.

Во новиот запис се наведува дека осудениот имал тешка и неповратна дијагноза, со здравствена состојба која прогресивно се влошувала. Поради тоа било предложено да биде помилуван за преостанатиот дел од казната. Со указ од 15 декември 2023 година, целосно бил ослободен од издржувањето на преостанатата затворска казна.

Сепак, бугарскиот весник отвора прашање зошто било потребно помилување кога издржувањето на казната веќе било прекинато поради болеста. Не е објаснето ниту зошто случајот бил внесен во регистарот дури сега.

Вториот нов случај, заведен под број 30, се однесува на 40-годишна жена, мајка на три малолетни деца, која живее со семејството во Србија. Во Бугарија била осудена на шест месеци пробација за дело поврзано со незаконско уништување, оштетување, поседување, стекнување или отуѓување примероци од загрозени диви животински видови.

Во регистарот се наведува дека ресоцијализацијата и воспитно-корективниот процес се одвивале успешно и дека целите на казната во значителна мера биле постигнати.

Како причина за помилувањето се посочува дека, според правната рамка, казната не можела да се извршува во државата во која жената живее и работи. Нејзиното редовно враќање во Бугарија за исполнување на пробациските мерки претставувало сериозна тешкотија и ризик за грижата за трите малолетни деца, особено затоа што нивниот татко работи во бродскиот сообраќај.

Весникот „Сега“ забележува дека во последните години регистарот и извештаите на Комисијата за помилувања се пополнуваат невнимателно, со малку информации и со значителни доцнења. Новооткриените случаи повторно го отвораат прашањето за транспарентноста и навременото објавување на одлуките за помилување во Бугарија.

Share on Facebook

Tweet

Follow us

Save