Албанец од Косово осуден за членство во ИСИС

Министерството за правда на Соединетите Американски Држави (САД) објави дека Албанец од Косово, Лирим Сулејмани, кој има и американско државјанство, е осуден на 10 години затвор од страна на Окружен суд на САД за членство во терористичката организација Исламска држава (ИСИС).

Според соопштението на Министерството за правда на САД објавено вчера, Сулејмани, познат и како Абу Сулејман ал-Косови, се изјаснил за виновен на 12 декември минатата година. Федералниот судија Рудолф Контрерас ја изрече пресудата на 2 јуни и нареди Сулејмани, по издржувањето на казната, да биде под доживотен надзор.

„Сулејмани ќе помине една деценија во затвор размислувајќи за предавството што го изврши против оваа земја. Секој што мисли дека ИСИС е решението, треба повторно да размисли. Ќе одиме до крај за да го спречиме секој поединец кој има за цел да им наштети на нашите граѓани“, , се вели во соопштението.

Според документите што ги поседува американското Министерство за одбрана, Сулејмани дошол во Сирија во ноември 2015 година со своето семејство, каде што живеел до 2019 година и дека во тој период поминал 21 ден воена обука, за време на која научил да користи оружје како што се АК-47, М-16 и рачни гранати, а потоа бил распореден во батаљон во Мосул, Ирак.

Исто така, се додава дека тој положил заклетва на верност на поранешниот лидер на ИСИС, Абу Бакр ал-Багдади, и дека во мај 2016 година учествувал во битката за Манбиџ против коалициските сили предводени од САД.

Сулејмани и неговото семејство биле заробени од коалициските сили на 27 февруари 2019 година, додека биле во Багуз, последното упориште на ИСИС.

По неговото заробување, тој бил задржан во затворот Даштиш под контрола на Сириските демократски сили, а потоа бил предаден на американските власти на 15 септември 2020 година, за да се соочи со правдата.

Share on Facebook

Tweet

Follow us

Save