INFOMAX.MK

Возач од Албанија во саботата бил уапсен на граничниот премин Ѓуешево, откако бугарските власти откриле голема пратка марихуана во вредност од половина милион евра во неговиот камион.

„На 06.06.2026 година на ГП Ѓуешево, по метода на анализа на ризик, царински службеници од одделот ‘Борба против наркотрафик’ избрале за детална контрола товарно возило со албански регистарски таблички, кое пристигнувало од Северна Македонија. При прегледот на кабината, во специјално изработен скриен дел, биле пронајдени шест вреќи со зелена тревкаста материја со силен мирис“, соопштија бугарските власти.

Пронајдената марихуана вкупно тежи 60 килограми и 920 грама, се додава во соопштението, со проценета вредност од околу 500.000 евра.

Возачот на камионот, 28-годишен албански државјанин, се обидел да побегне по откривањето, но брзо бил приведен од страна на граничната полиција.

По наредба на Окружното обвинителство во Ќустендил, возачот бил задржан до 72 часа. Обвинителите сега бараат судска одлука за понатамошен притвор додека трае истрагата.

Властите нагласија дека начинот на кој била скриена дрогата укажува на намерна шверцерска активност.

Истрагата за потеклото и за крајната дестинација на пратката е во тек.