INFOMAX.MK

Американскиот амбасадор во Израел, Мајк Хакаби, ги повика вработените во амбасадата кои сакаат да го напуштат Израел да го сторат тоа „денес“, бидејќи Стејт департментот го одобри заминувањето поради безбедносни ризици за персоналот кој не е во итна служба.

Хакаби преку електронска пошта испратена утрово во 10:24 часот по локално време изјави дека вработените и членовите на нивните семејства кои сакаат да заминат „треба да го сторат тоа денес“, според „Њујорк тајмс“, повикувајќи се на три извори кои ја потврдија автентичноста на пораката.

„Фокусирајте се на обезбедување место до која било дестинација од каде што можете да го продолжите патувањето до Вашингтон, но приоритет е да ја напуштите земјата што е можно поскоро“, рече Хакаби, со порака дека „нема причина за паника“, но дека е важно да се испланира заминувањето „што е можно поскоро“.

Во исто време, амбасадата на САД во Израел објави дека Стејт департментот одобрил заминување на службеници на американската влада кои не се ангажирани со итни задачи, како и на членовите на нивните семејства од израелската мисија, поради безбедносни ризици.

Во објава на социјалната мрежа X, амбасадата на САД исто така наведува дека, како одговор на безбедносни инциденти и без претходна најава, може дополнително да го ограничи или забрани движењето на американските функционери и членовите на нивните семејства во одредени делови од Израел, Стариот град на Ерусалим и Западниот Брег.

На американските граѓани им се препорачува да размислат за напуштање на Израел додека комерцијалните летови се сè уште достапни.