Американската војска тестирала 50 функционери на детектор за лаги поради протечени информации

Некои од највисоките американски воени функционери биле подложени на полиграфски тестови во рамки на истрага за протекување доверливи информации, објави „Си-би-ес њуз“, повикувајќи се на американски функционери запознаени со случајот.

Тројца извори, кои зборувале под услов на анонимност, изјавиле дека претседателот Доналд Трамп бил „бесен“ поради протекувањето на строго класифицирани податоци за залихите на оружје. Еден од нив рекол дека многу мал број луѓе имале пристап до тие податоци, што предизвикало сомнеж дека некој од нив можеби соработува со странска разузнавачка служба.

Полиграфските тестови и вообичаено се користат како дел од безбедносните проверки на воени функционери. Сепак, според американски официјални лица, бројот на луѓе опфатени со тестирањето во овој случај бил невообичаено голем.

Според „Њујорк тајмс“, воените истражители во август спровеле полиграфски тестови врз околу 50 воени офицери. Меѓу нив биле и претставници на Централната команда на САД, како и команданти на други воени единици.

Главниот портпарол на Пентагон, Шон Парнел, синоќа изјави дека Министерството за одбрана не коментира внатрешни истражувања.

Само неколку недели по почетокот на војната со Иран, американските медиуми објавија дека САД забрзано ги трошат дел од своите најнапредни видови муниција, чии залихи се ограничени.

Во јули, секретарот за одбрана Пит Хегсет соопшти дека Пентагон и Министерството за правда формирале заедничка работна група за да ги откријат и гонат оние кои се осомничени дека им доставуваат чувствителни владини информации на медиумите.

Со формирањето на работната група, истрагата што претходно ја водел кабинетот на Хегсет значително се проширила.

Share on Facebook

Tweet

Follow us

Save