АМЕРИКА ГО ПОДГОТВУВА ИЗРАЕЛ ЗА ТРЕТ БРАН НА НАПАДИ ВРЗ ИРАН: ЦЕНТКОМ испратил предупредување до израелската армија!

Американската Централна команда (ЦЕНТКОМ) испратила порака до највисоките претставници на израелската армија за можноста од започнување трет бран воени напади врз Иран, објави израелскиот Канал 13.

Според информациите што ги пренесуваат и повеќе либански медиуми, командантот на ЦЕНТКОМ ги информирал високите израелски воени функционери дека Соединетите Американски Држави би можеле да започнат нова, трета фаза од нападите врз ирански цели.

Израелскиот медиум наведува дека американската порака се однесува на можноста за нова воена ескалација, при што меѓу потенцијалните цели се споменуваат и стратешки инфраструктурни објекти во Иран.

Според пренесените информации, американските напади би можеле да бидат насочени кон мостови и електроенергетски постројки, што би претставувало значително проширување на воените операции против Техеран.

Овие информации доаѓаат во момент кога американскиот претседател Доналд Трамп повторно упати сериозни предупредувања до иранските власти.

Во изјава за Си-Ен-Ен, Трамп порача дека војната со Иран може да биде избегната доколку биде постигнат „силен договор“, но истовремено предупреди дека американската војска има идентификувано 38 мостови што би можеле да бидат уништени за само еден час.

Според „Ројтерс“, Трамп изјавил дека е малку веројатно да нареди нови напади доколку дипломатските преговори резултираат со прифатлив договор.

Во меѓувреме, дипломатските разговори меѓу Вашингтон и Техеран продолжуваат со посредство на Катар, но двете страни сè уште имаат сериозни несогласувања околу иранската нуклеарна програма, економските санкции и условите за прекин на конфликтот.

Иранските власти предупредуваат дека секое продолжување на американските и израелските напади ќе предизвика нов одговор против американските и израелските интереси во регионот.

Можноста за трет бран напади дополнително ја зголемува загриженоста од поширока регионална ескалација, особено поради ризикот од напади врз енергетската инфраструктура и нарушување на поморскиот сообраќај низ Персискиот Залив.

Share on Facebook

Tweet

Follow us

Save