„Безбеден град“ од 12 октомври се проширува во Охрид, Струга, Кичево и Дебар

Системот за автоматско регистрирање сообраќајни прекршоци „Безбеден град“ од 12 октомври ќе започне да се применува и на подрачјето на Охрид, Струга, Кичево и Дебар, најави министерот за внатрешни работи Панче Тошковски.

Со проширувањето ќе биде опфатено подрачјето на СВР Охрид, а целта е да се зголемат сообраќајната дисциплина и безбедноста на патиштата.

Во Охрид и Струга претходно беа поставени околу 40 сообраќајни камери на позначајни раскрсници, на влезовите и излезите од градовите, како и на патните правци кон Кичево, Дебар, граничниот премин Ќафасан и други фреквентни локации. Дел од камерите се поставени и на патот Охрид–Кичево, кај Горенци, Требеништа, Ботун и Ново Село во Општина Дебрца.

Системот автоматски ги регистрира прекршоците, при што фотографиите и видеозаписите служат како доказ во постапката. Меѓу прекршоците што се евидентираат се пречекорување на дозволената брзина, поминување на црвено светло и управување возило со нерегуларни регистарски ознаки или без важечка регистрација.

„Безбеден град“ официјално започна да се применува на 1 февруари 2026 година, најпрво во Скопје, Куманово и Тетово, како и на делови од коридорите 8 и 10. Според МВР, неговото воведување придонело за намалување на бројот на сообраќајни прекршоци и несреќи во подрачјата каде што веќе функционира.

Тошковски најави дека процесот на проширување ќе продолжи, со цел системот постепено да ја опфати целата територија на државата.

Share on Facebook

Tweet

Follow us

Save