Безмалку 10 илјади Хрвати сами побарале да им се забрани влез во коцкарници

Сè поголем број граѓани во Хрватска доброволно се откажуваат од учество во игри на среќа преку Регистарот на исклучени играчи, механизам кој им овозможува на лицата со проблеми со коцкањето да си забранат пристап до сите лиценцирани приредувачи на игри на среќа во земјата.

Според податоците на Хрватскиот институт за јавно здравје, до 25 мај во регистарот биле евидентирани 9.615 лица. Најголемиот дел од нив, односно речиси 90 проценти, побарале трајно исклучување од коцкање.

Повеќето барања биле поднесени преку електронскиот систем за граѓани, додека 3.605 лица се самоисклучиле преку самите организатори на игри на среќа. По истекот на периодот на забрана, 1.536 лица побарале нивните податоци да бидат отстранети од регистарот.

Сите лиценцирани оператори во Хрватска се поврзани со овој систем и имаат обврска да го проверат статусот на секој играч пред да му дозволат учество во игри на среќа. Регистарот беше воведен со измените на Законот за игри на среќа во 2025 година.

Податоците покажуваат дека проблематично коцкање има кај 1,7 проценти од возрасната популација, додека дополнителен дел од граѓаните покажуваат умерен или низок степен на ризик поврзан со коцкањето.

Загрижувачки се и податоците за младите. Според европско истражување спроведено во 2024 година, 22 проценти од учениците на возраст од 15 и 16 години изјавиле дека учествувале во некаков вид игри на среќа во текот на претходната година.

Во текот на 2024 година, 252 лица биле лекувани од зависност од коцкање, а бројот на третмани во дневните болници достигнал 2.734, што претставува благ пораст во однос на претходниот период.

Share on Facebook

Tweet

Follow us

Save