Бизарна афера во Финска: Русија осомничена за упади во домовите на пратеници и оставање измет во тоалетите

Финска истражува серија мистериозни упади во домовите на пратеници, а дел од политичарите и безбедносните експерти се сомневаат дека зад инцидентите би можеле да стојат руски разузнавачки структури кои се обидуваат да ги заплашат претставниците на власта.

Случајот доби бизарен пресврт откако британски „Телеграф“ објави дека во најмалку еден од домовите било откриено дека непознато лице извршило нужда и оставило фекалии во тоалетот. Во други случаи пратениците забележале отворени врати или вклучени светла, иако биле сигурни дека ги оставиле домовите поинаку. Притоа, според досега објавените информации, ништо вредно не било украдено.

Финскиот парламент потврди дека добил информации за сомнителни неовластени влегувања во домовите на повеќе пратеници и дека случаите се предадени на полицијата. Хелсиншката полиција на 1 октомври официјално соопшти дека започнала прелиминарна истрага и дека работи заедно со Националното истражно биро.

Според финскиот јавен сервис Yle, станува збор за помалку од 20 сомнителни случаи во текот на изминатата година. Карактеристично е што во дел од домовите немало очигледни траги од насилно влегување, ниту пак биле украдени предмети. Наместо тоа, биле оставени мали, но забележливи знаци дека некој бил внатре.

Еден од пратениците кои јавно ја посочија можната руска врска е Бен Зискович од владејачката Национална коалициска партија. Според него, ваквото однесување би можело да има психолошка цел – на политичарите да им се покаже дека се следени и дека некој може да влезе во нивните домови.

Сомнежите кон Москва се поврзуваат со претходно документирани методи на заплашување и психолошки притисок врз дипломати и други цели. Сепак, засега нема официјален доказ дека руските разузнавачки служби стојат зад конкретните случаи во Финска.

Токму затоа финските власти повикуваат на претпазливост. Потпретседателката на парламентот Паула Рисико нагласи дека во оваа фаза не може да се шпекулира кој е одговорен и дека утврдувањето на фактите е задача на полицијата. И фински безбедносни експерти предупредуваат дека прераното припишување на секој инцидент на Русија може дополнително да придонесе за атмосфера на страв и несигурност.

Инцидентите доаѓаат во период на исклучително затегнати односи меѓу Хелсинки и Москва. Финска стана членка на НАТО во 2023 година, а односите со Русија драматично се влошија по руската инвазија врз Украина.

Доколку истрагата утврди дека зад упадите навистина стои странска разузнавачка служба, случајот би претставувал необичен пример на психолошка операција: наместо кражба или класична шпионажа, целта би била политичарите да добијат едноставна и вознемирувачка порака – некој бил во нивниот дом и сакал тие да го знаат тоа.

Share on Facebook

Tweet

Follow us

Save