Битка за кеш од 2 трилиони евра во ЕУ: Отворена една од најтешките финансиски дебати!

Лидерите на Европската Унија денеска во Брисел ја отворија една од најтешките политички и финансиски дебати во последните години – преговорите за долгорочниот буџет на Унијата за периодот 2028-2034 година, вреден околу 2 трилиони евра.

Предлогот на Европската комисија предвидува значителни средства за одбраната, конкурентноста, технолошкиот развој и други нови приоритети, но истовремено отвора прашања за финансирањето на традиционалните политики како земјоделството и кохезионите фондови.

Како и во претходните буџетски циклуси, се судираат интересите на побогатите земји-членки, кои повеќе уплаќаат во заедничката каса отколку што добиваат назад, и помалку развиените членки кои се нето-корисници на европските фондови.

Австрија, Холандија и неколку други нето-плаќачи бараат дополнителни кратења и поголема модернизација на трошењето, додека Шпанија и други држави предупредуваат дека предложениот буџет е недоволен за исполнување на европските амбиции. Австрискиот канцелар Кристијан Штокер порача дека земјите кои повеќе придонесуваат „не се банкомат на Европската Унија“.

Покрај расправата за расходите, на маса се и нови извори на приходи за буџетот. Меѓу опциите што се разгледуваат се приходи од продажба на јаглеродни дозволи, дел од акцизите на тутунските производи, давачки за дигитални услуги, крипто-добивки и други европски даночни механизми.

Преговорите се очекува да траат со месеци. Иако формалниот рок за усвојување на буџетот е крајот на 2027 година, европските институции сакаат договор да биде постигнат уште до крајот на 2026 година за да се избегне дополнителна неизвесност во изборната година во неколку земји-членки.

Извор: Euronews

Share on Facebook

Tweet

Follow us

Save