Блумберг: Американската „олигархија“ се збогати за 1,5 билиони долари за време на мандатот на Бајден

Американскиот претседател Џозеф Бајден, кој ја напушта функцијата за неколку дена, во својот проштален говор ја критикуваше „олигархијата“ и „технолошкиот индустриски комплекс“ кои наводно ја загрозуваат американската демократија. Блумберг наведува дека, сепак, 100-те најбогати луѓе во САД за време на неговиот мандат станале побогати за вкупно 1,5 билиони долари.

„Денес во Америка се формира олигархија со екстремно богатство, моќ и влијание што буквално ја загрозува целата наша демократија, нашите основни права и слободи и правичната шанса за сите да напредуваат“, рече Бајден.

Богатството на најбогатите 0,1 отсто од Американците се зголеми за 6 билиони долари во текот на четиригодишниот период под Бајден, според Блумберг. Пазарите на акции и недвижности пораснаа за време на закрепнувањето по пандемијата, надминувајќи ги американските конкуренти.

Сите групи на приходи и богатство измерени од ФЕД се барем малку повисоки отколку во 2020 година, а американските домаќинства се побогати за околу 36 билиони долари. Мерено во долари, тоа зголемување беше малку повисоко од она што беше забележано во времето на претходникот и наследникот на Бајден, Доналд Трамп, но инфлацијата ја комплицира целокупната слика.

Во реални услови на куповна моќ, вклучувајќи ја и инфлацијата, богатството на најбогатите и приходите на средните домаќинства растеа со побрзо темпо за време на мандатот на Трамп, пренесува Танјуг.

Share on Facebook

Tweet

Follow us

Save