INFOMAX.MK

Длабоко сме вознемирени од дејствијата на Македонија за ограничување на правата на здружување и слободно изразување на бугарската заедница во земјата – рече Коџабашев.

Институциите во Скопје не изнесоа вистински аргументи за оспорување на регистрацијата на бугарските здруженија – изјави денеска заменик-министерот за надворешни работи на Бугарија, Костадин Коџабашев на прес-конференција, како реакција на вчерашното бришење на клубот „Иван Михајлов“ од Централниот регистар на Македонија, известуваат бугарски медиуми.

Коџабашев најави дека „Бугарија ќе се обрати до Европската Унија за заштита на правата на Бугарите во Македонија“.

– Длабоко сме вознемирени од дејствијата на Македонија за ограничување на правата на здружување и слободно изразување на бугарската заедница во земјата – рече Коџабашев.

Тој нагласи дека при затворањето на бугарскиот клуб „Иван Михаилов“, „Скопје не изнесе вистински аргументи“.

– Одлуката е непринципиелна и тенденциозна и со тоа имињата на здруженијата се ставаат во искривен историски и идеолошки контекст. Фактот дека верувањата на Бугарите во РСМ не се компатибилни со тамошната историска доктрина, не значи дека не се компатибилни со правниот поредок и демократските принципи. Оценките за Иван Михајлов не се потпираат на обемниот корпус на историски докази и се насочени кон зачувување на монополот на намерно и ревизионистичко толкување на нашата заедничка историја, особено во однос на тврдењата за антисемитските убедувања на Иван Михаилов – вели заменик-министерот.

Тој потсети дека Бугарија сè уште чека информации и ефикасна правда против сторителите на, како што вели, нападите врз бугарските здруженија.

– Бавното спроведување на правдата е силно во спротивност со брзината со која беше донесена одлуката за бришење на клубот во Битола – рече Коџабашев.