„Вардар филм“ ќе одбележи 75 години постоење со бројни активности и проекција на долгометражен документарен филм

НУФЦ „Вардар филм – Скопје“ годинава одбележува јубилеј – 75 години постоење. Првиот човек на институцијата, директорот Сани Саиди на денешната прес конференција ја претстави програмата со која ќе се одбележи овој значаен јубилеј

Програмата содржи повеќе активности кои ќе се реализираат во текот на оваа јубилејна година, која е планирано да кулминира со голема свечена манифестација за премиерно прикажување на долгометражниот документарен филм посветен на Вардар Филм.

Во програмата се предвидени и прикажувања на најзначајните и наградувани филмски дела од ризницата на Вардар Филм. На наше задоволство проекциите ќе се одржуваат во скоро реновираната сала за проекции, која воедно со првата проекција за прв пат ќе биде отворена за јавноста, информираше Саиди.

Според Саиди, во септември е планирано да се одржи отворена недела за граѓаните кои сакаат да се запознаат со просториите и активностите на институцијата.

На средбата со новинарите присуствуваше и продуцентот Буњамин Куртиши, кој работи на документарниот филм за „Вардар филм“ заедно со режисерот Владимир Блажевски и информираше дека подготовките се во тек и на крајот на октомври ќе може да се погледне премиерата на филмот.

Share on Facebook

Tweet

Follow us

Save