Велешкото обвинителство отвори предмет за негувателката што им давала електронска цигара на деца во градинка

Велешкото Обвинителство оформи предмет по допрен глас за да се проверат информациите дека негувателка во детската градинка „Димче Мирчев“ – Велес им давала да пушат електронска цигара на децата од нејзината група.

„Во насока на испитување евентуални основи на сомнение за кривично дело запуштање и малтретирање дете, надлежен јавен обвинител издаде наредби и насоки до МВР за преземање дејства што вклучуваат да се извршат разговори со лица (вработени и родители) кои би можеле да имаат определени сознанија за настанот“, извести Обвинителството.

Се преземаат и други дејства, а предметот е во фаза на предистрага.

Претходно, родители на неколку деца тврдеа дека негувателката им понудила на децата да пробаат од нејзината електронска цигара. Директорката на градинката потоа изјави дека негувателката е суспендирана и за неа се води дисциплинска постапка. Од друга страна, како што беше објавено, негувателката во писмениот исказ изјавила дека настанот се случил ненамерно и дека децата посегнале по цигарата без нејзино знаење, која сепак била оставена на дофат. Останува Обвинителството да истражи.

Share on Facebook

Tweet

Follow us

Save