INFOMAX.MK

Кошаркарите на Лос Анџелес Лејкерс се пласираа во финалето на НБА Купот, откако ноќеска повеќе од убедливо го совладаа Њу Орлеанс пеликанс (133-89) во вториот полуфинален меч од завршниот турнир во Лас Вегас.

„Езерџиите“ за историскиот трофеј во новото натпреварување ќе играат против Индијана пејсерс, која претходно беше подобра од Милвоки бакс (128-119). Лејкерси до победата ги предводеше маестралниот Леброн Џејмс, кој имаше импресивни бројки. Ветеранот натпреварот го заврши со 30 поени со фантастичен шут 9/12 од поле и 4/4 од три поени, на кои додаде осум асистенции и пет скока. Најефикасни кај Њу Орлеанс, пак, беа Треј Марфи со 14 и Зион Вилијамсон со 13 поени.

Индијана, пак, до победата ја предводеа Тајрис Халибартон со 27 поени, 15 асистенции и седум скока и Мајлс Тарнер со 26 поени и 10 скока. Кај Милвоки подобар од останатите беше Јанис Адетокумбо со 37 поени и 10 скока.

Големото финале се игра во ноќта помеѓу сабота и недела по македонски време (2.30 часот) исто така во Лас Вегас, а секој кошаркар од победничкиот тим ќе добие награда од по 500.000 долари.