(Видео) Нови поплави во Србија: Наврнаа преку 120 литри дожд, прогласена вонредна состојба во неколку општини

Нови поплави во неколку општини во соседна Србија, прогласена е вонредна состојба во неколку од нив.

Во општина Петровац на Млава поради обилните дождови синоќа и утринава е прогласена вонредна состојба. Таму само утринава од пет до седум часот наврнаа околу 120 литри дожд на метар квадратен, што доведе до полнење на канализацијата за дожд и излевање на водата. Во утринските часови во некои делови од градот водата стигнала до половина од вратите на автомобилите, што може да се види и од видеата кои кружат на социјалните мрежи.

-Вонредната состојба првенствено е прогласена за да се овозможи ангажирање на потребната механизација која ќе учествува во отстранување на опасноста и санирање на оштетената инфраструктура – изјави Христина Ѓорѓевиќ, шеф на кабинетот на градоначалникот на Петровац на Млава.

Најкритично во село Лесковац

Проценето е дека дека поради обилните врнежи во целата општина има зголемување на нивото на водата во реките од прв и втор ред, како и во нивните поројни притоки и потоци, а има и појава на подземни води.

-Во постојан контакт сме со граѓаните и нè известија дека имаат проблеми со подземните води, дека некаде е оштетена патната инфраструктура. Најкритично е во селото Лесковац каде се поплавени најголем број домаќинства, а потоа село Шетоње. Најважно е да нема повредени. Во Рановац, Витовница и Мелница не се поплавени куќите, туку поројните реки Витовничка и Стамничка во кои се влеваат поројните потоци се излеале во нивите. Во Петровац имаме дојава дека влегла вода во подрумите – рече Ѓорѓевиќ.

Се уште нема информации колку домаќинства и обработливи површини се поплавени, бидејќи се уште се врши проценка. Членови на Штабот за вонредни состојби и претседатели на месни заедници се на терен со цел што поскоро да се утврдат штетите и да се започне со отстранување на последиците. Упатија барање до граѓаните да пријават во штабот доколку им се оштетени домаќинствата или обработливите ниви од поплавата.

Вонредна состојба во општина Жагубица

Вонредна состојба е прогласена и на дел од територијата на општина Жагубица за населените места Рибаре, Осаница, Крепољин, Сиге, Милановац, Крупаја, Близнак, Медвеѓица и Брезница.

Според Предраг Ивковиќ, заменик градоначалник на општината, на ова подрачје наврнале најмалку 100 литри дожд на метар квадратен. Водата навлегла во десетина станбени згради, а најмногу настрадала инфраструктурата, Атар и локалните патишта во селата каде е прогласена вонредна состојба.

-Во Жагубица е формирана комисија за проценка на штетите и се надеваат на помош од државата во санација. Во моментов измена на режимот на сообраќај има на делницата Крупаја – Крепољин и Петровац на Млави – Крепољин. Одрони имало и на повеќе места на патот Крепољин – Деспотовац во населбата Милановац. Сообраќајот се одвива бавно, на повеќе места на еден коловоз. Екипите се на терен и работат на расчистување – соопштија од ЈП „Патишта Србија“.

ЛИНК од видеото