INFOMAX.MK

Силен пожар избувна вечерва во гасното наоѓалиште Кор Мор (Khor Mor), едно од најголемите и најважните во Ирак, откако објектот беше погоден во напад со беспилотно летало. Производството на природен гас е целосно прекинато, а нападот предизвика сериозни нарушувања во снабдувањето со електрична енергија во автономниот регион Курдистан.

Според информациите на „Ројтерс“, нападот се случил во неделата, 8 ноември, кога дрон погодил резервоар за складирање течен нафтен гас, предизвикувајќи голем пожар кој продолжил да гори и по прекинот на производството.

Вработените биле итно евакуирани во засолништа во рамките на комплексот, поради стравување од дополнителни напади и можни експлозии.

Според првичните информации од ирачките власти, во нападот нема загинати или повредени лица.

Министерствата за природни ресурси и електрична енергија на Курдистан нападот го квалификуваа како терористички чин и соопштија дека се преземаат итни мерки за ограничување на последиците.

Последиците врз енергетскиот систем се веќе сериозни. Според регионалното Министерство за електрична енергија, прекинот на испораките на гас предизвикал губење на околу 2.800 мегавати производствен капацитет за електрична енергија.

Кор Мор е најголемото ирачко производствено наоѓалиште на природен гас што не е поврзано со експлоатација на нафта и има клучна улога во снабдувањето на електраните во Курдистан.

Со наоѓалиштето управува конзорциумот „Перл Петролеум“, во кој значајни удели имаат компаниите „Дана Гас“ и „Кресент Петролеум“ од Обединетите Арапски Емирати.

Нападот доаѓа во период на исклучително високи тензии на Блискиот Исток, додека војната меѓу САД и Иран продолжува да ја загрозува енергетската инфраструктура и регионалната безбедност.

Кор Мор и претходно бил цел на ракетни и беспилотни напади. Во јули годинава операторот привремено го прекинал производството поради сериозни безбедносни закани, пред активностите повторно да бидат обновени.

Засега ниту една вооружена организација не ја презела одговорноста за вечерашниот напад. Иако во минатото проирански вооружени групи биле обвинувани за напади врз енергетската инфраструктура во ирачки Курдистан, нема потврда кој стои зад најновиот инцидент.

Новото уништување на енергетската инфраструктура дополнително ја усложнува состојбата во Ирак, кој веќе се соочува со сериозни економски и енергетски последици од регионалниот конфликт и нарушувањето на поморскиот сообраќај низ Ормускиот Теснец.

❗️ Iraq’s BIGGEST GAS FIELD GOES UP IN FLAMES after reported ‘DRONE ATTACK’ — KHOR MOR operations HALTED https://t.co/yTTHK8aF9z pic.twitter.com/IFchwqGc2l

— RT (@RT_com) November 8, 2026