INFOMAX.MK

На социјалните мрежи се појавија видеа од израелски војници кои користат „требуше“, вид катапулт кој се користел во средниот век за опсада.

Тие пукаа со огнени топки преку ѕидот за да предизвикаат пожар во Либан. Според израелските медиуми, либанската погранична област има густа вегетација, што е проблем за израелските сили бидејќи таквата вегетација го олеснува нападот и инфилтрирањето на Хезболах во пограничната област.

На почетокот на конфликтот, резервисти на израелската армија се обидоа да запалат грмушки со молотови коктели, а либански извори објавија и употреба на фосфорни бомби за палење пожари и запаливи дронови.

За да го решат проблемот без да се потпираат на скапоцена артилерија, резервистите одлучија да состават требуше, направа која фрла камења и запалени предмети на оддалеченост од неколку стотици метри, објави Тајмс оф Израел.

Ова древно оружје се користело во Европа до 15 век. Според „Енциклопедија британика“, требушето потекнува од Кина помеѓу 5 и 3 век п.н.е. До 6 век од нашата ера, пронајдокот се проширил низ Евроазија и стигнал до Медитеранската област.

Опсадната машина била клучна за бројни воени освојувања, вклучително и за муслиманските кампањи од 7 век во Близок Исток и во Северна Африка, како и за монголските инвазии на Евроазија во текот на 13 и 14 век.

Некои научници сугерираат дека машината за опсада можеби играла улога во развојот на теоретската механика во средниот век. Се тврди дека зглобната противтежа, чија директна патека до земјата обезбедувала помоќно лансирање, можеби го инспирирала европскиот математичар од 13 век Јорданус де Немор во неговата концептуализација на позициската гравитација, идејата дека објектот врши повеќе работа при вертикално спуштање одошто предмет со еднаква тежина на наклон со иста должина.

https://x.com/clashreport/status/1801120069981818979?ref_src=twsrc%5Etfw%7Ctwcamp%5Etweetembed%7Ctwterm%5E1801120069981818979%7Ctwgr%5E9b124a46e5baecd7280ef2ae9b553f0d03b72783%7Ctwcon%5Es1_&ref_url=https%3A%2F%2Fplusinfo.mk%2Fsovremena-vo-na-so-primesi-na-gospodar-na-prstenite-izraelcite-napadnaa-so-srednovekovno-oruzh-e%2F