INFOMAX.MK

На социјалните мрежи се појави видео од жена која се качува по ѕид на бунар за да дојде до вода. Оваа снимка го истакна огромниот недостиг на вода во неколку области на централната индиска држава Мадја Прадеш, пишува Би-Би-Си.

На видеото се гледа како жената се спушта низ бунарот без јаже за да пристапи до капка вода.

Луѓето во селото Гусија се принудени да преземат такви екстремни мерки откако им се исушија бунарите и езерцата.

Неколку други области низ Индија се соочуваат со слична криза со недостиг на вода.

Видеата што покажуваат како Индијците ги ризикуваат своите животи за да добијат вода често стануваат вирални. Во април, слично видео покажа жена како слегува во бунар во државата Махараштра за да земе вода.

Глобален извештај од 2019 година ја наведе Индија меѓу 17 земји каде што „стресот за водата“ беше „исклучително висок“.

Во извештајот се вели дека државите Мадја Прадеш, Пенџаб, Раџастан, Утар Прадеш, Гуџарат, Утаракханд и Харајана се меѓу најтешко погодените од кризата.

Во Мадја Прадеш, недостигот на вода е проблем кој се повторува секое лето. Државната влада вети снабдување со вода од чешма за секое село до 2024 година. Но, водата за пиење сè уште е недостапна за милиони луѓе.

„Мораме да слеземе по бунарот за да собереме вода. Има три бунари [тука], сите се речиси исушени. Ниту една рачна пумпа нема вода“, рече една жена за новинската агенција АНИ.