(Видео) Хрватскиот министер Дабро, полугол и по влечки, пука со „калашников“ во поле
Откако неодамна се појави фотографија на која се гледа доскорешниот хрватски министер и вицепремиер во владата на десничарската ХДЗ, Јосип Дабро, со „калашников“ во рацете, медиумите денеска ја објавија и снимката од инцидентот поради кој министерот за земјоделство беше принуден да поднесе оставка.
Неодамна, исто така, беше објавена и друга снимка, на која Дабро пука со пиштол во автомобил во движење.
На новата снимка, министерот, гол го појасот, со влечки на нозете, стои во поле и испукува осум куршуми од автоматската пушка. Во Хрватска, инаку, не постои законска можност цивили да поседуваат автоматско оружје. Видеото е уште поинтересно ако се земе предвид изјавата на Дабро кога беше објавена фотографијата.
„Пушка? Која пушка?“ – се чудеше тогаш Дабро пред новинарите.
Дабро поднесе оставка минатата недела, откако се појави видеото во кое пука низ прозорец од автомобил. Полицијата влезе во домот на поранешниот функционер и изврши претрес.
– Секоја нова снимка само ја зајакнува нашата верба дека мора да истраеме во борбата за хрватското земјоделство и решавање на проблемите во хрватските шуми. Колку е поголем притисокот, толку сме посилни – напиша претходно Дабро на Фејсбук.
