Вицепремиерката Грковска ќе присуствува на молитвениот појадок во Вашингтон и ќе има средби во Стејт департментот и Конгресот на САД

Заменичката на претседателот на Владата задолжена за политики за добро владеење Славица Грковска, од денеска е во посета на Соединетите Американски Држави, каде на 2 февруари ќе присуствува на Националниот молитвен појадок што ќе се одржи во Вашингтон.

Овој настан, кој има 70-годишна традиција на исто место собира повеќе од 3.500 гости, светски лидери, претставници на бизнис секторот, верски водачи и истакнати личности кои зборуваат на политички и социјални теми.

Како што се наведува во соопштението од владината прес служба, во рамките на посетата на САД, вицепремиерката Грковска ќе има средба и со заменик-помошникот државен секретар на САД и специјален претставник за Западен Балкан, Габриел Ескобар, со сенаторката Џини Шахин, претседавач со Поткотмитетот за надворешни прашања за Европа и регионална безбедносна соработка на Сенатот, како и со Ричард Нефју, координатор за Глобална антикорупција на Стејт департментот на САД.

Вицепремиерката Грковска ќе оствaри средба и Џејсон Орландо, директор во Трезорот на САД во канцеларијата за техничка помош, како и со Семи Ширеј, постар лидер на Самитот за демократија.

Во рамки на работната посета на Вашингтон вицепремиерката Грковска ќе се обрати на Форумот на тема „Како да се спречи руската агресија врз Украина и штетното влијание на Кина во Европа“, во организација на конгресмените Роберт Адерхолт и Пит Сешнс. Грковска ќе биде панелист и на дебатата „Како да се спречи руското и кинеското влијание во Западен Балкан“, во организација на Трансатлантската мрежа на лидери.

Share on Facebook

Tweet

Follow us

Save