Влијание на санкциите кон Русија? Германија бара да се обнови Трансатланското трговско партнерство меѓу ЕУ и САД

Германија бара да се обноват дискусиите за Трансатлантското трговско и инвестициско партнерство (TTIP) меѓу ЕУ и САД, кои беа прекинати од поранешниот американски претседател Доналд Трамп.

„Треба да ги продолжиме преговорите за трансатлантскиот договор за слободна трговија“, изјави Кристијан Линднер, министер за финансии на европската економија број еден, за германскиот деловен весник Handelsblatt.

„Особено сега во криза, станува јасно колку е важна слободната трговија со партнерите ширум светот кои ги споделуваат нашите вредности“.

Трамп ги повлече САД од дискусиите за TTIP – што беше предмет на преговори меѓу Брисел и Вашингтон од 2013 година, за време на администрацијата на Обама – велејќи дека меѓународните трговски договори ги повредуваат американските работници и ја оштетуваат конкурентноста на земјата.

Во последниве години, имаше повици од голем број официјални лица за рестартирање на закочените разговори, но други беа повнимателни.

Амбасадата на САД во Берлин не одговори директно на предлогот на Линднер, но изјави дека постојниот Совет за трговија и технологија САД-ЕУ гарантира дека координираните политики поддржуваат широк раст.

„Сегашната криза покажува дека Соединетите Држави и Германија и Европската Унија се незаменливи партнери“, се вели во соопштението.

Share on Facebook

Tweet

Follow us

Save