ВМА Белград: Состојбата на пациентите од Македонија е сериозна

Шест пациенти од пожарот во Кочани се на лекување во Воено-медицинската академија во Белград и еден е во Ниш и сите се во тешка состојба, јави МИА од Белград. Тоа го изјави попладнево заменик началникот на ВМА, Иван Лековиќ.

Пациентите се транспортирани со три амбулантни возила и транспортен авион на Армијата на Србија, а еден пациент со воен санитет е пренесен во Воената болница во Ниш.

„Сите пациенти примени на ВМА се млади, родени од 1998 до 2007 година и се на одделението за Интензивна нега, а нивната состојба е сериозна и тешка“, изјави полковник Лековиќ.

„Покрај изгорениците што ги имаат сите, пациентите имаат и знаци и симптоми на труење од гасови како и повреди при вдишување, односно оштетувања на дишните органи и бели дробови. Третманот е долготраен, бара бројни хируршки интервенции, вклучување на бројни други специјалисти… Сето тоа бара време и многу труд“, рече полковник Лековиќ.

Пациентот кој е примен во Воената болница во Ниш е опериран и исто така е во тешка состојба.

Share on Facebook

Tweet

Follow us

Save