Волц: САД ќе продолжат со максималниот притисок врз Иран, но вратата за преговори останува отворена

Американскиот амбасадор во ОН, Мајк Волц, денеска изјави дека претседателот на САД, Доналд Трамп, е решен да спречи Иран некогаш да се стекне со нуклеарно оружје, додавајќи дека вратата за враќање на Техеран на преговарачката маса и натаму е отворена доколку тоа го направи „со добра волја“.

„Претседателот Трамп е решен да обезбеди Иран никогаш да не може да го држи светот како заложник со нуклеарно оружје и ќе продолжи да применува максимален притисок за да ја оствари таа цел“, наведе Волц во објава на платформата Икс, споделувајќи дел од своето излагање на настан во Њујорк организиран од „Ал-Монитор“. За време на настанот, тој ја опиша американско-израелската војна против Иран како продолжение на 47-годишниот конфликт.

Волц истакна дека иранскиот режим се наоѓа во најслабата позиција во последните четири децении.

„Иранскиот режим е во најслабата точка од 1979 година и станува сè послаб. Тие ќе се вратат на преговорите, се надевам мирно и дипломатски“, изјави Волц, укажувајќи на економските притисоци врз земјата и на драстичниот пад на вредноста на иранската валута.

На прашањето на Ендрју Парасилити, виш советник на „Ал-Монитор“, дали времето е на страната на САД во конфликтот со Иран и дали постои можност за преговори, Волц одговори: „Верувам дека е така“, повторувајќи дека вратата останува отворена доколку Техеран пристапи искрено.

Иран негира дека настојува да развие нуклеарно оружје. Во 2015 година, Техеран со светските сили потпиша договор со кој ја ограничи својата нуклеарна програма во замена за ублажување на санкциите. Сепак, САД во првиот мандат на Трамп се повлекоа од договорот, по што тој престана да функционира.

Share on Facebook

Tweet

Follow us

Save