INFOMAX.MK

Војник на италијанскиот контингент на КФОР денеска загина во сообраќајна несреќа кај Пеќ.

Како што информираат од КФОР, војник кој бил на должност во Ново Село, загинал од последиците на несреќата што се случила во 15 часот и 30 минути, додека бил во воено возило ВМ90, покрај патот што ги поврзува општините Пеќ и Клина.

Тој бил во критична состојба и без свест и веднаш со хеликоптер бил префрлен во Приштина, но починал околу 16 часот и 50 минути.

Во возилото во несреќата имало уште еден војник кој во свесна и стабилна состојба бил пренесен во кампот Вилаџо, а потоа испратен во воената болница во Камп Филм Сити, на понатамошни проверки.

Командантот на КФОР, генерал-мајор Озкан Улуташ изрази сочувство, наведувајќи дека неговите мисли се со семејството и пријателите на војникот кој загина во трагични околности.

Посакуваме и се надеваме на брзо закрепнување на вториот повреден војник, изјави Улуташ.

Меѓународната воена полиција моментално ги истражува причините за несреќата, со локални и меѓународни власти, се додава во соопштението.