Во Словенија задолжителен божиќен бонус од најмалку 741 евро – во Хрватска исплатите се од 200 до 500 евра

Вработените во Словенија годинава ќе добијат задолжителен божиќен бонус од најмалку 740,94 евра, додека во соседна Хрватска висината на празничниот додаток ќе зависи од колективните договори, интерните правилници и одлуките на работодавачите.

Со воведувањето на таканаречениот „зимски регрес“, Словенија ја направи исплатата на божиќниот бонус законска обврска за сите работодавачи. Износот е поврзан со минималната бруто-плата, која во 2026 година изнесува 1.481,88 евра, а задолжителниот додаток е утврден на половина од таа сума.

Право на целиот износ од 740,94 евра имаат работниците кои во текот на целата година биле вработени со полно работно време кај ист работодавач. За оние кои работеле пократок период или со скратено работно време, предвидена е пропорционална исплата. Крајниот рок за исплата е 18 декември.

За разлика од Словенија, во Хрватска не постои општа законска обврска за исплата на божиќен бонус. Сепак, дел од државните компании веќе ги утврдиле износите што ќе им ги исплатат на своите вработени.

Највисок бонус меѓу наведените компании ќе добијат вработените во Хрватската електростопанска компанија (ХЕП), по 500 евра, што претставува мало зголемување во споредба со минатогодишните 497,71 евро.

Вработените во Финансиската агенција (ФИНА) ќе добијат по 350 евра, додека во Хрватски патишта, ХЖ Инфраструктура и ХЖ Патнички превоз се предвидени по 250 евра. Хрватските автопати (ХАЦ) ќе исплатат по 200 евра, исто како и минатата година.

За државните службеници и административните работници во Хрватска, согласно колективниот договор, предвиден е божиќен бонус од 300 евра. Истата сума ќе ја добијат и вработените во хрватскиот Сабор кои ќе бидат во работен однос на Божиќ, без оглед на работниот стаж. Пратениците, пак, немаат право на овој додаток.

По 300 евра се предвидени и за вработените во неколку министерства, меѓу кои Министерството за финансии, Министерството за просторно уредување, градежништво и државен имот и Министерството за регионален развој и фондови на Европската Унија, доколку во меѓувреме не биде постигнат поинаков договор.

Со ваквите правила, Словенија гарантира минимален празничен додаток за вработените, додека во Хрватска износите значително се разликуваат во зависност од работодавачот и колективните договори.

Share on Facebook

Tweet

Follow us

Save