Во терористички напад: Мајка на грчка политичарка загина по подметнат пожар во нејзиниот стан во Солун

Мајката на политичарка од владејачката партија Нова демократија во Грција почина од повредите здобиени во подметнат пожар, еден од низата напади насочени кон партиски функционери. Вагија Нестора (72) подлегна на тешки изгореници и откажување на повеќе органи во болница во Солун, објави Би-Би-Си .

Несреќната жена почина рано наутро во среда во експлозија и пожар подметнат во станбената зграда каде што живее нејзината ќерка, Афродити Нестора. Според болнички извори, таа е примена во критична состојба со изгореници на околу 80 проценти од телото. Нејзината ќерка, членка на партијата, исто така се здобила со изгореници и вдишување чад и е сè уште хоспитализирана. Таткото на Афродити Нестора, кој има хронични здравствени проблеми, и уште двајца жители биле однесени во болница поради тешкотии со дишењето.

Нападот врз зградата на семејството Нестор беше еден од трите напади што се случија во Солун во рок од неколку минути еден по друг. Полицијата извести дека импровизирани експлозивни направи биле поставени пред зградата, предизвикувајќи експлозија и пожар. Два автомобила беа уништени, неколку мотоцикли беа оштетени, а зградата претрпе значителна штета.

Два други напади, со употреба на молотови коктели и други импровизирани направи, беа насочени кон домовите на Зисис Јоакеимовиц, претседател на одборот на Нова демократија во Солун, и поранешниот пратеник Савас Анастасијадис. Во овие инциденти нема повредени. Според достапните информации, нападите се случиле во 4:18, 4:23 и 4:35 часот наутро. Полицијата се сомнева дека истите сторители, кои патувале на мотоцикл, стојат зад сите три напади.

Премиерот Киријакос Мицотакис рече дека смртта на Вагија Нестора ја разоткрива „убиствената и нечовечка природа“ на политичкото насилство и повика на обединет одговор за „туркање на тероризмот на маргините“. Претходно, тој рече дека оние кои извршуваат вакви напади под маската на социјална борба „не се ништо друго освен обични криминалци и ќе бидат третирани како такви“.

Share on Facebook

Tweet

Follow us

Save