Вучевиќ: Немаат аргументи против резултатите, па удираат по Вучиќ, патријархот и народот

Претседателот на Српската напредна странка (СНС) и советник на претседателот на Србија, Милош Вучевиќ, изјави дека нападите врз српскиот претседател Александар Вучиќ не се насочени кон еден човек, туку кон политиката на независна Србија и правото на српскиот народ да ги зачува своето име, вера, историја и иднина.

„Србија ќе продолжи да победува со вредна работа, резултати и вистина. Србија победува“, напиша Вучевиќ на социјалната мрежа „Икс“, реагирајќи на, како што наведе, обвинувањата упатени кон Република Србија, Српската православна црква, претседателот Вучиќ и српскиот народ од страна на Миловој Бешлин, Вукашин Милиќевиќ, Един Омерчиќ и Иван Ејуб Костиќ.

Според Вучевиќ, кога неговите политички противници немаат аргументи против постигнатите резултати, тогаш започнуваат, како што рече, „најмонструозните навреди“ кон претседателот Вучиќ, патријархот и сè што го претставува српскиот народ.

„И тоа само затоа што не успеаја да спроведат обоена револуција, да ја урнат Србија, да ја понижат, да ѝ наметнат колективна вина и да ја означат како геноциден народ. Затоа денес бесно го напаѓаат секој што се бори за Србија“, порача Вучевиќ.

Тој оцени дека Вучиќ е персонификација на слободарската и суверена политика која, според него, ја води Србија по патот на самостојното одлучување, економскиот развој и националната гордост.

„Благодарение на неговата политика, Србија денес има углед, сила и меѓународна позиција каква што никогаш немала во својата современа државност“, истакна Вучевиќ, додавајќи дека Србија денес е почитувана и на Запад и на Исток и е способна самостојно да носи одлуки во интерес на своите граѓани.

Share on Facebook

Tweet

Follow us

Save