Вучиќ ја повика ЕУ да ги прими државите од Западен Балкан како група

Српскиот претседател Александар Вучиќ смета дека Европската Унија треба да го промени пристапот кон проширувањето и наместо да ги оценува земјите од Западен Балкан поединечно, да го прими целиот регион како единствен пакет.

Во интервју за британскиот весник „Фајненшл тајмс“, Вучиќ изјави дека сегашниот модел, кој сè повеќе се темели на принципот на индивидуални заслуги и напредок на секоја држава, не е најдобро решение за регионот. Тој посочи дека во моментов Црна Гора и Албанија се најнапредни во пристапните преговори, но смета дека раздвојувањето на земјите може да создаде нови поделби.

„Што сакате да изградите? Посилни граници меѓу сите? Ако сите одиме заедно, нема да има граници меѓу Приштина, Белград и сите други“, изјави Вучиќ.

Според него, интеграцијата на целиот Западен Балкан во Европската Унија во исто време би придонела за поголема стабилност и би спречила создавање нови политички и економски разлики меѓу соседните држави.

„Ни треба регионот да биде обединет, за да не стане нова зона на конфликт меѓу луѓето што ќе влезат во ЕУ и оние што ќе останат далеку од членството“, нагласи српскиот претседател.

Вучиќ истакна дека Западен Балкан треба да се гледа како единствен геополитички простор и дека заедничкото пристапување би било во интерес и на Европската Унија и на земјите од регионот.

Неговите изјави доаѓаат во период кога Брисел продолжува со процесот на проширување. Денеска се очекуваат важни состаноци поврзани со напредокот на Украина и Молдавија во пристапните преговори, како и нови чекори за Црна Гора и Албанија, кои се меѓу најнапредните кандидати за членство во Европската Унија.

Европската Унија во последните години сè повеќе го применува принципот на „заслуги“, според кој секоја држава напредува кон членството со сопствено темпо, во зависност од исполнувањето на реформите и усогласувањето со европските стандарди. Вучиќ, пак, смета дека ваквиот пристап не придонесува за долгорочна стабилност на Балканот и дека е потребна поинаква стратегија за интеграција на целиот регион.

Share on Facebook

Tweet

Follow us

Save