INFOMAX.MK

Турскиот суперлигаш Газиантеп, каде игра младинскиот македонски репрезентативец Лука Станковски и официјално денеска се откажа од турската елита и нема да ја доигра сезоната после катастрофалниот земјотрес кој го погоди градот и регионот во југоисточна Турција и одзема досега безмалку 30.000 животи.

После Хатајспор, кој прв се откажа, па вчера и второлигашот Јени Малатија, денеска официјално Газиантеп објави дека нема да ја доигра сезоната, што беше и очекувано, а го најави и претседателот на турскиот фудбал Мехмед Бујукекси пред неколку дена.

„Не е возможно нашиот клуб да продолжи со спортски активности во вакви тешки услови. Бордот на директори одлучи Газиантеп да се откаже од Суперлигата и од Турскиот куп за сезоната 2022/23. Ние само се надеваме дека градот и земјата ќе ги залечат раните од овој земјотрес што е можно побрзо и благодариме до секој за помошта и поддршката. Ние остануваме да веруваме дека набрзо повторно нашите навивачи ќе ги видат своите миленици“, објави Газиантеп во соопштение.

Со повлекување на Хатајспор и Газиантеп, турската Суперлига сега остана на 17 екипи, но овие два клуба од најпогодениот регион многу извесно е дека нема да го загубат статусот на суперлигаши и ќе останат да играат во новата сезона без оглед што нема да ја доиграат актуелната.

Станковски пред една година замина од Работнички во овој турски клуб.

Извор: sport1.mk