Галибаф до Вашингтон: Немаме ништо ново да кажеме, исполнете ги седумте услови

Претседателот на иранскиот парламент, Мохамед Багер Галибаф, порача дека САД можат да ја стекнат довербата на Техеран единствено преку исполнување на седумте ирански услови претставени во Њујорк, пренесе агенцијата „Мехр“.

„Немаме ништо ново да кажеме. Америка не може да ја стекне довербата на Иран освен со спроведување на седумте услови што ги претставивме во Њујорк“, изјавил Галибаф на средбата со началникот на пакистанската армија, Асим Мунир.

Тој ја обвини администрацијата на Доналд Трамп за прекршување на претходното разбирање од Исламабад и оцени дека американските закани дополнително ја продлабочиле недовербата.

Изјавата доаѓа во време на обновени посреднички напори за надминување на застојот меѓу Вашингтон и Техеран. Иранската страна бара конкретни американски чекори пред отворањето на следната фаза од преговорите.

Според претходните извештаи на „Ројтерс“, меѓу иранските барања се укинување на американската поморска блокада, олеснување на ограничувањата за извоз на иранска нафта, ослободување замрзнати средства и прекин на непријателствата на сите фронтови. Тие се поврзани со предлогот за повторно отворање на Ормускиот Теснец во рок од седум дена.

Клучното несогласување останува редоследот на чекорите. Вашингтон инсистира нуклеарната програма да биде опфатена од почетокот, додека Техеран бара прво да се исполнат условите за деескалација и обновување на поморскиот сообраќај.

Иранскиот министер за надворешни работи, Абас Арагчи, во неделата потврди дека предлогот останува на маса. Засега нема објавена согласност од двете страни за неговото спроведување.

Share on Facebook

Tweet

Follow us

Save