Германија со критики до Србија поради „неприфатливата“ политика за мигранти

Германските власти денеска ја критикуваа „неприфатливата“ визна политика на Србија дека придонесува за напливот на мигранти во ЕУ и го повика блокот да преземе координирана акција на тековните разговори оваа недела. Берлин се противи на безвизниот режим на Белград за неколку земји чии граѓани ја користат Србија како транзит за влез во ЕУ.

Министерката за внатрешни работи Ненси Фезер рече дека таа и нејзините колеги од ЕУ ќе разговараат за „ситуацијата во Србија и засилено распоредување на (граничната агенција на блокот) Фронтекс“ на состанок в петок, јави ДПА.

„Јасно да се каже: визната практика на Србија е неприфатлива и води кон (зголемени) движења на балканската рута“, изјави таа во Берлин.

Србија, кандидат за евентуално членство во ЕУ, е на таканаречената балканска рута што ја користат мигрантите кои се упатуваат кон Западна Европа додека бегаат од војна и сиромаштија на Блискиот Исток, Азија и Африка.

Извештајот на Европската комисија за 2022 година за миграцијата и азилот, објавен овој месец, покажа дека „се поголем број луѓе“ пристигнуваат по воздушен пат во Србија поради нејзините „безвизни режими“. (МИА)

Share on Facebook

Tweet

Follow us

Save