INFOMAX.MK

Претседателот на пратеничката група на Христијанско-демократската унија (ЦДУ) во Бундестагот, Јенс Шпан, поднесе оставка поради скандалот поврзан со услугите за сурогат-мајчинство во Соединетите Американски Држави, бидејќи оваа практика е забранета во Германија, пренесува Дојче веле.

Јенс Шпан е еден од многуте германски политичари кои отворено ја покажуваат својата хомосексуалност. Тој живее со Даниел Функе од 2010 година, а стапија во брак во 2017 година.

Во средата, во интервју за весникот „Билд“, тој објави дека тој и неговиот сопруг станале татковци и дека „Георг е нивната најголема среќа“.

Сурогат-мајката, односно практиката на сурогат-мајчинство, го става своето тело на располагање за носење и раѓање дете и за тој период добива паричен надомест, наведува DW, додавајќи дека Христијанско-демократската унија се противи на ова и дека тоа е многу важно прашање за оваа конзервативна владејачка партија.

„Со оглед на етичките, правните и практичните сомнежи поврзани со сурогат-мајчинството, ЦДУ на Германија го потврдува своето барање сурогат-мајчинството, вклучително и алтруистичките модели, да остане забрането во Германија со цел да се спречат злоупотреба, експлоатација и здравствени ризици“, се наведува во одлуката донесена оваа година на партискиот конгрес во Штутгарт.

Поради оваа одлука, Шпан се соочи со повици за оставка, што тој и го стори.

„Разликата меѓу мојата приватна одлука да имам дете преку сурогат-мајчинство и разбирливите очекувања што беа поставени пред мене како претседател на пратеничката група стана поголема отколку што очекував“, изјави тој во своето писмо за оставка.

Коментирајќи ја оставката на Шпан, лидерот на партијата Фридрих Мерц напиша на социјалната мрежа „Икс“ дека тоа е „правилна и неизбежна одлука“.

„Кредибилитетот е најважната работа во политиката“, додаде Мерц.