Голем недостиг, се прават залихи: Србите доаѓаат и во Македонија за да се снабдат со млеко!

Големиот недостиг од млеко на полиците во последните денови во српските маркети, ги натера жителите на Врање уште еднаш да ја искористат близината на граничниот премин со Македонија, па ги искористија викендите да наполнат гориво во земјава, а сега доаѓаат и да купат млеко. Според сведоштва на српските граѓани, млекото во Македонија е поскапо отколку во нивната земја, но како што велат го има доволно по маркетите низ земјава.

Во најснабдените маркети во Врање сè уште нема свежо млеко, нема ниту долгорочно млеко, само повремено на некои маркети може да се најде понекоја амбалажа, но, како што велат продавачите, „набрзина го снемува“.

„Луѓето прават залихи, затоа што неколку пати нашле празни полици поради панично купување, а сега дури и тие што купиле некои вообичаени, нормални количини, купуваат неколку пакувања ако има количина“, вели вработен во познат синџир на маркети, објави српскиот медиум „Нова“.

Залихи им носат многу жители на Врање кои викендов заминале да купат млеко во соседна Македонија или роднини и познаници кои заминале, додаваат оттаму.

„На братучетка ми и донесов неколку пакети бидејќи пред да дојдеме на гости ми кажа дека овде нема млеко. Колку што знам, во Скопје го има доволно и чудно е затоа што најчесто е млеко од Босна и Херцеговина или Србија“, вели за „Нова.рс“ Елизабета од Скопје.

Како што додава, не ни забележала дека луѓето во паника купуваат на големо, а смета дека тие што го прават тоа во Србија создаваат дополнителни проблеми.

Долготрајното млеко во Македонија чини околу 70 денари, а луѓето од Србија кои го купуваат во нашата земја ризикуваат да имаат проблеми на границата поради транспорт на тој вид храна.

Во меѓувреме, оние кои имаат среќа или ги познаваат локалните сточари, можат да добијат литар свежо млеко во Врање за околу 75 динари, од продавачите на пазарот веднаш по молзењето или од околните села.

Share on Facebook

Tweet

Follow us

Save