Голем удар врз руската технологија: Дронови погодиле центар со суперкомпјутери за вештачка интелигенција

Војната меѓу Русија и Украина влезе во нова, технолошки чувствителна фаза, откако напад со дронови погодил еден од најважните центри за обработка на податоци на руската технолошка компанија „Јандекс“.

Според Ројтерс, нападот бил извршен врз центарот во Сасово, каде што се сместени десетици илјади сервери и значителен дел од руската инфраструктура за развој на вештачка интелигенција.

Компанијата потврдила дека нападот предизвикал пожар и привремено прекинување на работата на објектот.

Особено загрижувачко за руската технолошка индустрија е што во овој центар се сместени два од трите суперкомпјутери што „Јандекс“ ги користи за развој на својот модел за вештачка интелигенција YandexGPT.

Компанијата сè уште не потврдила дали суперкомпјутерите се оштетени.

Во дополнително соопштение објавено во текот на денот, „Јандекс“ признал дека размерите на штетата сè уште се проценуваат и дека не може да гарантира оти опремата ќе биде обновена.

Нападот предизвикал технички проблеми кај повеќе руски интернет-платформи, додека акциите на компанијата забележале пад од околу три проценти.

Ова е првиот голем потврден напад врз руски центар за податоци од почетокот на војната.

Досега главните цели на нападите со дронови беа нафтени рафинерии, складишта за гориво, пристаништа, воени постројки и транспортна инфраструктура.

Но нападот врз Сасово покажува дека дигиталната инфраструктура станува сè поважна во современите воени конфликти.

Уништувањето или долготрајното онеспособување на ваквите центри може да има последици врз финансиските услуги, комуникациите, индустријата и развојот на вештачката интелигенција.

За Москва, која се обидува да изгради сопствен технолошки сектор во услови на западни санкции, потенцијалното губење на напредна компјутерска инфраструктура претставува дополнителен предизвик.

Share on Facebook

Tweet

Follow us

Save