Грк ja истепал двојно помладата партнерка во живо на „Тикток“

65-годишен маж вчера бил уапсен на грчкиот остров Крит, откако гледач пријавил дека го видел како ја тепа својата 28-годишна партнерка за време на пренос во живо на „Тикток“, објави „Екатимерини“.

Гледачот се јавил на итниот број 112, по што полицијата од станицата во градот Малевизи била известена за случајот.

Полициските службеници го пронашле осомничениот и го уапсиле во куќа каде бил заедно со жртвата и со неговата 15-годишна ќерка, која била присутна за време на инцидентот.

28-годишната жена, која е од град во северозападна Грција, наводно им кажала на полицајците дека не сака да поднесе тужба.

Истрагата покажала дека полицијата претходно имала уште седум пријави за случаи на семејно насилство поврзани со мажот, а на жената превентивно ѝ било доделено копче за паника.

Осомничениот ќе биде изведен пред обвинител, кој ќе поднесе обвинение.

Share on Facebook

Tweet

Follow us

Save