Грција се спрема да ѝ испрати остро предупредување на Украина

Грција се подготвува да испрати остро предупредување до Украина дека треба да ги повлече сите свои дронови од крајбрежјето на земјата, објави „Катимерини“.

Ова предупредување не значи промена на политиката, велат грчки претставници на владата. Како и од почетокот на руската инвазија во февруари 2022 година, Грција цврсто ја поддржува Украина врз основа на принципот на територијална неповредливост.

Соочена со територијалните претензии на својот номинален сојузник Турција во Егејското Море, Грција се противи на насилна промена на границите под какви било околности.

Откако беспилотно површинско пловило, односно морски дрон, било пронајдено од рибари кај западниот грчки остров Лефкада, тоа било извлечено и испратено во поморска база во близина на Атина за испитување.

Добро информирани извори изјавиле за „Катимерини“ дека беспилотното пловило од типот „Мамај“ — трговско име „Козак Мамај“ — изградено специјално за камикаѕе-мисии, е само едно од многуте од тој тип што дејствуваат во источниот Медитеран.

Прелиминарниот извештај за инцидентот со морскиот дрон веќе бил доставен до грчкиот премиер Киријакос Мицотакис, кој треба да одлучи за следните чекори. Според наодите, пловилото не било изолиран случај, туку дел од поширока украинска операција во источниот Медитеран.

Станува збор за мали беспилотни површински пловила, со големина слична на џет-ски, што ги прави исклучително тешки за откривање. Грчките експерти процениле дека дронот бил пренесуван со брод без постојана база и дека претходно се движел и во близина на Либија.

Атина особено ја загрижува можноста украинските дронови да гаѓаат бродови од таканаречената „флота во сенка“, која превезува руска нафта со заобиколување на санкциите.

Дел од тие бродови, според пишувањата, некогаш биле во грчка сопственост. Грција стравува од погрешен удар врз танкер или врз патнички брод и од можни сериозни еколошки последици.

Share on Facebook

Tweet

Follow us

Save