Грчкиот шеф на дипломатијата во Приштина одби да се слика пред таблата „Република Косово“

Дендиас се сретна со косовската министерка за надворешни работи, Доника Гервал-Шварц.

Конференцијата во Приштина затоа се одржа од другата страна на салата, каде што го немало натписот „Република Косово“, туку само знамињата на Грција и Косово. Грчкиот министер не сакал да се фотографира ниту на влезот во зградата на Министерството за надворешни работи на Приштина, бидејќи таму бил присутен и насловот „Република Косово“, пренесува Телеграф.

На прес-конференцијата Дендиас ја истакна важноста од продолжување на дијалогот меѓу Белград и Приштина и ги повика двете страни да спроведат сѐ што е договорено досега. Инаку, Дендиас вчера имаше средба и со шефот на српската дипломатија Ивица Дачиќ.

По средбата со Дендиас, Дачиќ на прес-конференцијата рече дека го информирал грчкиот министер за надворешни работи за ситуацијата на Косово и за тоа што косовската страна не го почитува Бриселскиот договор. „Интересот на Србија е да го зачува мирот во регионот и да ги спречи сите можни инциденти, да биде фактор на мирот и стабилноста во регионот“, изјави српскиот министер за надворешни работи.

Дендиас рече дека во разговорот со Дачиќ го повторил ставот на Грција за Косово. „Продолжуваме да го поддржуваме дијалогот меѓу Белград и Приштина за да се постигне правно обврзувачко решение. Договорите што беа потпишани во минатото се важни и мора да инсистираме на нивно почитување. Ќе го повторам тоа во Приштина“, изјавил грчкиот министер.

Share on Facebook

Tweet

Follow us

Save