Грчките земјоделците го завршија протестот во Атина, тракторите си заминаа, но велат дека ќе продолжат со протести

Сообраќајот во центарот на Атина повторно е нормализиран, откако илјадници земјоделци од цела Грција, кои се собраа да протестираат против зголемувањето на трошоците за производство и силната конкуренција од странство, постепено го напуштија плоштадот Синтагма, пренесува „Катимерини“.

Полицијата соопшти дека авениите „Василисис Амалиас“, „Василисис Софијас“ и „Панепистиму“ се повторно отворени за сообраќај откако беа блокирани во текот на ноќта.

Околу 40 трактори и 2.500 демонстранти се собраа пред Парламентот во петокот, вклучувајќи земјоделци, сточари и пчелари од Ханија. Ним им се придружија претставници на синдикатот на јавниот сектор АДЕДИ, студентски здруженија и раководители на земјоделски задруги, кои присуствуваа во знак на поддршка.

Земјоделците протестираат со месеци поради трошоците за производство, ниските цени за нивните производи и доцнењата во исплатата на субвенциите поддржани од Европската Унија. Одгледувачите на добиток, чии стада беа уништени од масовно колење поради појава на овчји и козји сипаници, се придружија на собирите.

Производителите велат дека овие прашања биле покренати на претходните состаноци со премиерот, но не ја добиле поддршката што им е потребна за да преживеат. Пред да го напушти плоштадот Синтагма, Ризос Марудас, претседател на Обединетата федерација на земјоделски здруженија на Лариса, рече дека владата има фискален простор, но не и политичка волја да ги реши нивните проблеми, додавајќи дека протестите ќе продолжат сè додека не се исполнат барањата.

Share on Facebook

Tweet

Follow us

Save