INFOMAX.MK

Општина Нисирос ќе им исплаќа еднократна помош од 3.000 евра за секое новородено дете на семејствата кои се постојани жители на малиот остров во југоисточниот дел на Егејското Море, во рамките на мерките за спречување на намалувањето на бројот на жители.

Мерката, предложена од градоначалникот Христофис Коронаиос, едногласно е одобрена од општинскиот совет. За да имаат право на помошта, семејствата мора да бидат регистрирани во општината и да имаат постојано живеалиште на Нисирос во моментот на раѓањето на детето.

Сумата, за која општината наведува дека е максималната дозволена според новиот грчки Закон за локална самоуправа, ќе биде ослободена од данок и нема да се пресметува во приходниот праг за добивање други социјални бенефиции.

Општината во буџетот за 2026 година веќе има издвоено 9.000 евра за програмата, што овозможува мерката да започне веднаш.

Локалните власти исто така разгледуваат можност за воведување дополнителна помош од 150 евра месечно за секое дете до наполнување на петгодишна возраст. Оваа мерка засега е во фаза на разгледување и не е официјално воведена.

Коронаиос изјави дека мерките имаат цел да ги охрабрат младите да останат на островот и таму да создаваат семејства, со што би се запрел трендот на демографско опаѓање кој ги погодува многу од помалите грчки острови.

Општина Нисирос соопшти дека мерката е дел од поширока стратегија за поддршка на младите семејства и подобрување на демографската иднина на островот.