Гутереш: Нема место за анексии во современиот свет

Рускиот претседател Владимир Путин утре ќе иницира официјална анексија на 15 отсто од украинската територија и ќе претседава со церемонијата на потпишување на договорот за припојување на четирите украински региони кон Русија.

„Ниту една одлука за продолжување со анексијата на украинските региони Доњецк, Луганск, Херсон и Запорожје не треба да има правна вредност и секој заслужува осуда“, рече Гутереш.

„Тоа оди против сѐ што треба да претставува меѓународната заедница. Ги издава целите и принципите на Обединетите нации. Тоа е опасна ескалација. Нема место за тоа во современиот свет. Не смее да се прифати“, додаде Гутереш.

Тој нагласи дека секоја руска одлука да продолжи во таа насока дополнително ќе ги загрози перспективите за мир. Ова ќе ги продолжи драматичните влијанија врз глобалната економија, особено на земјите во развој, и ќе ја попречи способноста на ОН да испорача итна помош за Украина и пошироко.

„Крајно време е да се оддалечиме од бездната“, заклучил Гутереш.

САД подготвуваат резолуција за осуда на „референдумите“ во Украина, кои веќе беа осудени од Западот. Текстот прво ќе биде претставен пред Советот за безбедност на ОН, каде што без сомнение ќе биде блокиран со руско вето, за подоцна да биде претставен на Генералното собрание каде ниту една од 193-те земји-членки нема право на вето.

Share on Facebook

Tweet

Follow us

Save