Давеник и за сламка се фаќа… Откако го обвинија за корупција, Ганиу вели дека Арсовска и Апасиев „ги дискриминираат Албанците во Чаир“

Градоначалникот на Општина Чаир, Висар Ганиу, кого деновиве скопската градоначалничка Данела Арсовска јавно го обвинува за корупција со дивоградби во Чаир, реагира на „изјавите и однесувањето на лидерот на Левица, Димитар Апасиев“, обвинувајќи го за „говор на омраза кон Албанците“ и за „директна соработка“ со Арсовска и Блерим Беџети.

Во објава на „Фејсбук“, Ганиу вели дека „тројката Апасиев–Арсовска–Беџети го држи Скопје во заложништво и ја казнува Општина Чаир, каде што живее албанско мнозинство кое не прифаќа политичко потчинување, туку бара достоинство и еднаквост“.

„Четири години без инвестиции. Ниту паркови, ниту улици, ниту почит. Само ароганција и институционална дискриминација. Во меѓувреме, Град Скопје има собрано над 18 милиони евра од даноците на граѓаните на Чаир и не вратил ништо за возврат“, пишува Ганиу.

Арсовска денеска поднесе кривична пријава и докази за наводните злоупотреби од страна на Ганиу. Таа вели дека чаирскиот градоначалник учествувал во коруптивни зделки за издавање градежни дозволи за згради за кои Градот Скопје дал негативно мислење. Арсовска деновиве се жалеше дека добива закани поради јавното откривање на криминалите на Ганиу.

Share on Facebook

Tweet

Follow us

Save