INFOMAX.MK

Српскиот министерот за внатрешни работи Ивица Дачиќ денес изјави дека полицијата брзо реагирала на убиството на маж во центарот на Белград, и ги пронашла и уапсила сторителите во рок од еден час, и додаде дека е очигледно оти убиството било нарачано и дека сторителите, од кои едниот бил малолетник, биле платени за тоа.

Дачиќ изјави за ТВ Прва, кога беше прашан за вчерашниот случај на убиство на улицата „Гаврила Принципа“ во главниот град на Србија, дека бројот на убиства денес е намален во споредба со периодот од пред 10 или 15 години, но дека никогаш не може да има ситуација каде што воопшто нема такво нешто, бидејќи, како што додава, криминалот има своја логика.

-Кога се случуваат вакви ситуации, важно е полицијата брзо да реагира, а во овој случај две лица беа уапсени за помалку од еден час, пронајдени се и оружја, калибарот на куршумите од тие оружја се совпаѓа со калибарот на куршумите испукани кон жртвата. Од гледна точка на полицијата, случајот е решен, сторителите се уапсени со јасни докази, а мотивите и она што стои зад тоа се работи за истрагата и не би сакал да зборувам за тоа – рече тој.

Дачиќ додаде дека, според досегашните достапни информации, очигледно е дека некој го нарачал убиството.

-Еден од сторителите е малолетник. Очигледно е дека биле платени и дека луѓето што планирале да ги убијат седеле заедно во барот, а еден од двајцата бил убиен – рече Дачиќ.

На обвинувањата на одредени медиуми дека е убиено погрешно лице, Дачиќ вели дека сега тоа е прашање на криминалистичката полиција.

-Тешко е да се даваат вакви изјави, бидејќи некои работи се менуваат. Во моментов, информациите се вакви, за мене е важно што полицијата реагираше брзо и изврши апсења. Бројот на убиства е четири пати помал отколку пред 20 години. Нашите луѓе можат да кажат дека полицијата реагира брзо и си ја врши работата – заклучи Дачиќ.