Деби од соништата за Олмо, Барселона остана перфектна во Примера!

Екипата на Барселона со пресврт во второто полувреме ги освои трите бода на гостувањето кај Рајо Ваљекано (1-2), а херој на каталонскиот гигант беше новото засилување, Дани Олмо, кој имаше најубаво можно деби и го осигура триумфот за својот тим.

Домашниот состав влезе многу мотивирано во мечот, прикажа солидна игра во првиот дел, а успеа и рано да поведе, со голот на Унаи Лопез уште во деветтата минута. Барса имаше две солидни прилики за израмнување, но до паузата резултатот не се промени, 1-0.

Вториот дел беше сосема поинаква приказна за гостинскиот тим. Избраниците на Ханси Флик заиграа многу подобро, а тимот изгледаше многу посвежо со влегувањето на Дани Олмо на самиот старт. Барса полека тргнуваше кон остварување на мисијата, најпрво на 1-1 израмни Педри во 60. минута, а Дани Олмо ги постави конечните 1-2 во 82. минута.

Домашната одбрана за момент „заспа“, а тоа го искористи извонредниот Ламин Јамал, кој подели извонредна асистенција за Олмо. Каталонскиот клуб ја стартува сезоната со максимални „три од три“ и девет бода на табелата, а во следното коло ќе биде голем фаворит на домашен терен против Ваљадолид.

Share on Facebook

Tweet

Follow us

Save