Ден на жалост во Албанија за смртта на поранешниот премиер Фатос Нано

Албанија денес е ден на жалост за смртта на поранешниот премиер и основач на Социјалистичката партија Фатос Нано, кој почина пред два дена по тешка болест. Нано ќе биде погребан денес во Тирана. Во текот на денот на жалост, националните знамиња ќе бидат спуштени на половина копје во сите јавни и државни институции. Формирана е посебна државна комисија за организирање на церемонијата на збогување за Нано под надзор на премиерот Еди Рама, со претставници на главните државни и безбедносни институции.

Поранешниот премиер ќе биде почестен во Палатата на конгресите во Тирана, каде што беше донесен неговиот ковчег, покриен со албанското знаме, објави ABC News. До 11 часот, граѓаните ќе можат да се збогуваат со Нано, а од 11:15 до 11:45 часот ќе се одржи церемонија за оддавање државни почести. Напладне, сите јавни активности ќе бидат прекинати, со минута молчење.

Пет минути подоцна, ќе следи последното збогување за поранешниот премиер на Албанија, кој јавноста во таа земја го памети како клучна политичка фигура во транзицијата од комунистички во демократски систем. Фатос Нано ја започна својата политичка кариера во 1991 година, откако беше избран за претседател на преодната влада, со цел да ги организира првите демократски избори во Албанија истата година и да ја подготви земјата за транзиција кон пазарна економија и демократски систем. На изборите на 31 март 1991 година, Социјалистичката партија на Албанија победи и тој беше повторно назначен за премиер. По два месеци, тој беше принуден да поднесе оставка. Истата година, тој беше избран за претседател на Социјалистичката партија, која беше наследник на Партијата на трудот на Албанија.

Share on Facebook

Tweet

Follow us

Save