ДКСК казни 86 поранешни и актуелни функционери, меѓу нив и Џафери, Груби, Меџити, Крмов…

Државната комисија за спречување на корупција објави список со 86 поранешни и актуелни функционери кои ги казни парично за прекршување на Законот за спречување на корупција.

Меѓу нив се пратеникот Борислав Крмов од Левицата, ексвицепремиерот Артан Груби, кој е во бегство, поранешниот претседател на Собранието, Талат Џафери, Изет Меџити, првиот вицепремиер и министер за животна средина и просторно планирање, Фатмир Меџити, поранешен министер за здравство.

Од Комисијата велат дека во согласност со член 98 од Законот за спречување на корупцијата и судирот на интереси има обврска јавно да ги објави информациите за извршените контроли, спроведените постапки и глобите кои се изречени за сторените прекршоци.

Од донесувањето на Законот за спречување на корупцијата и судирот на интереси од 2019 година ДКСК ги нема јавно објавувано овие информации, а комисијата најавува дека ова во иднина ќе биде редовна пракса.

Јавно објавените информации, се додава во соопштението, ќе бидат достапни во период од две години по нивното објавување, а истите содржат кој е сторител на прекршокот, каков прекршок направил, опис на дејството кое претставува прекршок и висината на изречена глоба.

„Преку објавување на овие информации ДКСК има за цел да ја информира јавноста во насока на охрабрување на граѓаните, како и институциите да се придржуваат до правните норми. Очекуваме дека со исполнување на оваа законска обврскa ќе се зголеми довербата во процесите на надзор и контрола, но и ќе се зајакнат напорите за ефикасно спречување на корупцијата и судирот на интереси во Република Северна Македонија. ДКСК смета дека оваа мерка е исклучително значајна за зголемувањето на транспарентноста и отчетноста на секоја институција во борбата против корупцијата“, соопштија од ДКСК.

Share on Facebook

Tweet

Follow us

Save